Mirandês: Miranda l Douro assina cumbénio para cumprir la Carta Ouropeia de las Lhénguas Minoritairas

Miranda l Douro, Bergáncia, 27 jan (Lusa) - L Munecípio de Miranda l Douro bai a abançar cula assinatura de un cumbénio cula Associaçon de la Lhéngua i Cultura Mirandesa para cumprir ls 35 prancípios de la Carta Ouropeia de las Lhénguas Minoritairas, ponendo 25 mil ouros para isso.
"Apuis d'assinar l cumbénio, queremos que Pertual tenga las cundiçones formales para rateficar la Carta Ouropeia de Lhénguas Regionales i Minoritairas (COLM) i assi dar-le ua nuoba upa al mirandés", dixo-le l Persidente de la Cámara Munecipal de Miranda l Douro, Artur Nunes, a la Lusa.
L Persidente dixo tamien que cun l cumbénio fazeran-se alguns dequemientos para los mandar als çfrentes Menistérios cun mano ne l causo, cumo seian l Menistérios de ls Negócios Strangeiros, de l'Eiducaçon i de la Justícia.
La Persidente de l Quemité de Peritos para las Lhénguas Minoritairas habie dezido, an Miranda l Douro, ne l çtrito de Bergáncia, que Pertual ten to l que ye preciso para l'assinatura de la COLM.
La Lusa procurou-le al Menistério de ls Negócios Strangeiros i dezírun-le que Pertual respeita, ne l más amportante, las perpuostas de la COLM sien que l Stado se beia oubrigado a eilhas.
"L Secretairo Eizecutibo de la Carta Ouropeia de las Lhénguas Regionales i Minoritairas fui anté cumbidado pul Persidente de la Cámara Munecipal de Miranda l Douro para besitar la region an Dezembre de 2017, i esse cumbite tubo toda l'ajuda de las outeridades pertuesas", dixo fuonte oufecial de l Menistério de ls Negócios Strangeiros.
Segundo ls respunsables de la Associaçon de la Lhéngua I Cultura Mirandesa (ALCM), fúrun abaluados ls 35 prancípios mínimos de la COLM que Pertual ten de garantir.
Cada paíç q'assina l dequemiento tenerá que cumprir un númaro mínimo de ls campos de l'eiducaçon, admenistraçon, justícia, media, bida eiquenómica, relaçones raianas i colaboraçon anstitucional.
L cumbénio antre la Cámara i la ALCM será assinado na terça, die an que pássan 20 anhos de la publicaçon an Diário de la República de l "reconhecimento oufecial de ls dreitos lhenguísticos de la quemunidade mirandesa".
L dequemiento pormete, tamien, ajudara certeficar ls porsores de lhéngua mirandesa para dar scuola de Lhéngua i Cultura Mirandesa i la mudança curricular, para que nuns seia perciso to ls anhos ua outerizaçon special de l Menistério de l'Eiducaçon.
Tamien se quieren fazer alguas colaboraçones ciantíficas cun çfrentes ounibersidades pertuesas i strangeiras, antre outras perpuostas.
L'eideia de l'assinatura de l cumbénio cula ALCM ye "reforçar l papel de l mirandés, cumo lhéngua minoritaira, para que seia cada beç más amparada en Pertual i ne l mundo".
Por sou lhado, l Menistério de l'Eiducaçon balidou l'oufierta de l mirandés, legitimando l sou lhugar ne l curriclo, andrento de l'outonomie i custruçon de l mesmo curriclo.
"La scuola ten bisto garantida la possebelidade de scolher ls sous porsores por bias de la mobilidade", dixo fuonte de l Menistério de l'Eiducaçon.
De l lhado de ls respunsables de l'ALCM, fai falta la criaçon de ua "grande portalada" culas nuobas ferramientas de quemunicaçon, l que serie ua maneira de poder lhebar l mirandés cada beç más loinge, i al mesmo tiempo fezer del un chamadeiro para studantes, ambestigadores, falantes ou mesmo nó falantes, para que puodan daprender esta outra maneira de quemunicar.
"Ne l que toca al mirandés, ua de las cousas que más falta fai ye la criaçon dua portalada que puoda oufrecer anformaçon subre la lhéngua, quier dezir, ua portalada adonde se puoda abuntonar todo l qu ten que ber cula lhéngua, para poder ser lhibremente cunsultado por to ls anteressados", andicou l respunsable pula Associaçon.
L'atualizaçon desta portalada (quando steia de pies) fai tamien parte de l cumbénio a assinar cul Munecípio de Miranda de l Douro.

FYP // TDI
Lusa/fim