Die de la Lhéngua Mirandesa

L die 17 de setembre passou a ser l Die Oufecial de la Lhéngua Mirandesa, un claro dar fé de l die an que l Cunceilho de la República aprobou l decumento que determinou l reconhecimiento oufecial de ls dreitos lhenguísticos de la quemunidade mirandesa. Ua data que merece, anho atrás d’anho, comemoraçones cuncelhies, de maneira a agrandar ls balores deiqui i fazer cun que cada beç más mirandeses téngan proua desta seinha maior de la sue eidentidade. La lhéngua mirandesa ye un de ls maiores fincones, ne l nuosso grande i rico patrimonho cultural, defrenciador de la nuossa eidentidade. Ne l Die de la Lhéngua Mirandesa la Cámara fai houmenaige a todos quantos ténen dado cuntribuiçones a la sue dibulgaçon, para ls que acrecéntan obras al yá cunsiderable spólio literairo i, suobretodo, todos ls que fálan a diário la lhéngua mirandesa, ls berdadeiros guardianes, ls berdadeiros respunsables para que l mirandés se mantenga bibo i de buona salude de maneira a que se puoda perpetuar pulas geraçones que han de benir.

Porquei l die 17 de setembre i l camino de la Lei 7/99?

Para que pudira chegar a Lei, dou ls seguintes passicos:

• La propuosta entra no Parlamento a 4 junho 1998;

• Ye aceite a 5 de junho na Comisson de Céncia i Cultura;

• L relator de l parecer ye l deputado de l PPD/PSD Cruz Oliveira PSD i dá antrada an Plenário l die 17 de setembre de 1998. Ye nesta Reunion Plenária n.º 2 de la 4.ª sesson legislatiba que bai a botaçon esse die. Ye aprobada cun ls botos a fabor de todos ls partidos anton representados, PS, PSD, CDS, PCPi PEV i inda l deputado andepandiente Lemos Damião;

• A 19 de de nobembre de 1998 ye la botaçon final de l testo, anton aprobado por ounanemidade;

• La Redaçon final i porjeto de deliberaçon ye feito por Pedro Pinto de l PSD;

• L Decreto de publicaçon ye de 09 de janeiro de 1999;

• La promulgaçon dá-se a 15 de janeiro de 1999;

• Por fin, ye l die 29 de janeiro de 1999 que la Lei 7/99 ye publicada!